دائمی درد

دائمی درد بہت سی مختلف بیماریوں کی علامت ہو سکتا ہے، بشمول ذیل:

• فالج – اس قسم کے دائمی درد کو CPSP یا سنٹرل پوسٹ اسٹروک پین بھی کہا جاتا ہے۔
• ہارٹ فیل ہونا
• انجائنا
• لانگ کوویڈ (طویل کوویڈ)

دائمی درد کیا ہے؟

ہم سب کو کبھی کبھار درد کا سامنا کرنا پڑتا ہے۔ عام طور پر، اس کی وجہ کسی نہ کسی قسم کا زخم لگنا ہوتی ہے – مثال کے طور پر ہمیں کسی چیز سے چوٹ لگ گئی ہو یا کوئی کٹ لگ گیا ہو یا کوئی انفیکشن ہوا ہو۔

تاہم، کچھ لوگ دائمی درد کا تجربہ کرتے ہیں – یعنی ایسا درد جو طویل عرصے تک رہتا ہے اور ضروری نہیں کہ اس کی کوئی واضح جسمانی وجہ بھی موجود ہو۔ “دائمی” کا مطلب “طویل وقت تک رہنا” ہے۔

• جسم میں کہیں بھی جلن کا احساس، انتہائی تیز اور شدید درد
• خارش یا گدگدی
• جوڑوں میں یا کہیں اور درد
• جلن یا گرمی
• “ہلچل” یا چھوٹی، غیر آرام دہ جھٹکے محسوس کرنا
• پن اور سوئیاں
• دردناک بے حسی

دائمی درد ہر قسم کی بیماریوں اور مسائل کا نتیجہ ہو سکتا ہے یا یہ کسی ایسی جسمانی چوٹ سے بھی ہو سکتا ہے جو کبھی مکمل طور پر ٹھیک نہ ہو سکتی ہو۔ یہ مستقل ہوسکتا ہے یا یہ آتا جاتا رہتا ہے۔ آپ کے آس پاس کا ماحول بھی اس کو متحرک کر سکتا ہے۔ دائمی درد جسمانی اور جذباتی طور پر مشکل پیدا کر سکتا ہے. یہ آپ کے مزاج کو متاثر کر سکتا ہے۔ یہ سونا یا توجہ مرکوز کرنا بھی مشکل بنا سکتا ہے، جو تھکاوٹ کا باعث بن سکتا ہے۔ بہت سی چیزیں ہیں جو آپ اپنے درد سے نمٹنے میں مدد کے لیے کر سکتے ہیں۔

درد کو سمجھنا

درد قدرتی عمل ہے۔ یہ ہمارے جسم کا ہمیں یہ بتانے کا طریقہ ہے کہ جسم میں کچھ غلط ہو رہا ہے۔ تاہم، جسم میں کسی بھی عمل کی طرح، جس طرح سے ہم درد کا تجربہ کرتے ہیں وہ ایک پیچیدہ چیز ہے اور یہ غلط بھی ہو سکتی ہے۔ آپ کا جسم آپ کو یہ بھی بتاتا رہتا ہے کہ آپ کو پہلے سے معلوم ہونے کے بعد بھی کچھ غلط ہے!

ہم درد کو کیسے پروسس کرتے ہیں اس کے تین اہم مراحل ہیں:

1. محرک
   یہ وہ چیز ہے جو درد کا سبب بنتی ہے – یعنی کوئی چوٹ، انفیکشن یا اس جیسی کوئی چیز۔ ہمارے پورے جسم میں اعصابی سرے یا کنارے موجود ہوتے ہیں جو گرمی، سردی، دباؤ یا کھینچنے جیسی چیزوں کا ہمیں احساس دلانے کا کام کرتے ہیں۔ ان میں سے کوئی بھی آپ کے جسم کو یہ بتانے کے لیے متحرک ہو سکتا ہے کہ کچھ غلط ہو رہا ہے۔
2. منتقلی
   آپ کے اعصاب اپنے اعصابی سروں کی مدد سے معلومات کو آپ کے دماغ تک لے کر جاتے ہیں، جو عام طور پر ریڑھ کی ہڈی سے گزرتے ہیں۔ یہ عمل بہت تیزی سے ہوتا ہے، لیکن فوری نہیں ہوتا۔
3. پروسیسنگ
   آپ کے دماغ کا کوئی حصہ ایسا نہیں ہے جو درد پر عمل کاری کرتا ہو۔ اس کے بجائے، جسم کے مختلف حصوں سے موصول ہونے والے دردوں کے سگنل پورے دماغ اور ریڑھ کی ہڈی کے اوپری حصے میں پروسس ہوتے ہیں۔ یہ وہ جگہ ہے جہاں آپ کو درد کے بارے میں شعوری طور پر آگاہی حاصل ہوتی ہے اور جہاں سے اس پر ردعمل (جیسے گرم چولہے سے دور ہٹنا) کو متحرک کیا جاتا ہے۔

اگر ان تین مراحل میں سے کوئی ایک بھی غلط ہو جائے، تو یہ دائمی درد کا موجب بن سکتا ہے۔ مثال کے طور پر، آپ کے درد کو جاری رکھنے کا کوئی ایسا محرک ہو سکتا ہے جو مسلسل جاری رہتا ہو، جیسے مسلسل سوجن یا ایسی چوٹ جو ٹھیک نہیں ہوتی۔ یہ بھی ہو سکتا ہے کہ آپ کے وہ اعصاب نقصان زدہ ہو گئے ہوں جو درد کو متنقل کرتے ہیں، جس کی وجہ سے وہ بہت آسانی سے یا اکثر فعال ہو سکتے ہوں۔ آپ کے دماغ یا ریڑھ کی ہڈی کو بھی نقصان پہنچ سکتا ہے جو آپ کے درد پر کارروائی کرنے کی صلاحیت کو متاثر کرتا ہے۔

جب آپ کو دائمی درد ہو تو ایک اہم بات یاد رکھیں کہ ہو سکتا ہے کہ آپ کا جسم آپ کو جسم میں موجود کسی پس پردہ مسئلے کی اطلاع دے رہا ہو۔ یہ جاننا ضروری ہے کہ آپ کا درد عام طور پر کیسا محسوس ہوتا ہے، لہذا آپ کو یہ دیکھنا چاہئیے کہ آیا اس میں اچانک تبدیلیاں آتی ہیں۔

دائمی درد کی اقسام

دائمی درد کی چار اہم اقسام ہیں۔

1. ٹھیک نہ ہونے والی چوٹ
   بعض اوقات، ایسی چوٹ جو درد کا باعث بنتی ہے جو ٹھیک سے مندمل نہ ہوئی ہو یا وہ بالکل ٹھیک نہ ہو سکتی ہو۔ مثال کے طور پر، اگر آپ کو سانس کی بیماری ہو، تو آپ کو سینے یا گلے میں دائمی درد ہو سکتا ہے کیونکہ ان جگہوں میں ہونے والے نقصان کو ٹھیک ہونے کا موقع نہیں ملتا۔
2. ہائیپر الیجزیا (ہائی پر ال زیج یا)
   یہ دائمی درد کی ایک ایسی قسم ہے جس میں ایسی چیزیں جو عام طور پر تکلیف دہ ہو سکتی ہیں (جیسے چھوٹا کٹ یا ٹکراؤ) وہ معمول سے زیادہ تکلیف دے رہی ہوں۔
3. ایلوڈینیا (ایلو ڈے نیا)
   یہ ایک قسم کا دائمی درد ہے جس میں جسمانی احساسات جن کو عام طور پر تکلیف دہ نہیں ہونی چاہیئے (جیسے ہلکے سے چھونا یا گرم یا ٹھنڈا ہونا) وہ بھی درد یا تکلیف کا باعث بنتی ہوں۔ آپ نے اسے انتہائی حساسیت (ہائپر سنسٹویٹی) کے نام سے سنا ہو گا۔
4. ایڈیو پیتھک (ای ڈیو پیتھک) درد
   یہ کوئی بھی ایسا درد ہے جس کی کوئی واضح جسمانی وجہ معلوم نہ ہو سکے۔ یہ اکثر آپ کے اعصابی نظام یا دماغ کے ان حصوں کو پہنچنے والے نقصان کی وجہ سے ہوتا ہے جو درد پر کارروائی کرتے ہیں۔

آپ ایک ہی وقت میں ان میں سے کسی ایک یا تمام اقسام کے دردوں کا سامنا کر سکتے ہیں۔

دائمی درد کا علاج کیسے کیا جاتا ہے؟

دائمی درد کوئی بیماری نہیں ہے بلکہ یہ ایک علامات ہے اور اس کے علاج کا واحد طریقہ یہ ہے کہ اس مسئلے کا علاج کیا جائے جو اس کا باعث بن رہا ہے۔ تاہم، بہت سارے ایسے علاج دستیاب ہیں جو مختصر مدت میں آپ کے درد کی شدت میں کمی لا سکتے ہیں اور جن کا استعمال آپ ایسے وقتوں پر قابو پانے کے لیے کر سکتے ہیں جب آپ کا درد خاص طور پر زیادہ ہو۔

علاج

اس طرح کے درد سے بغیر نسخہ کے ملنے والی درد کی ادویات مثلًا آئیبو پروفن، اسپیرن یا پیراسٹامول کے ذریعے آرام آ سکتا ہے۔ یہ یقینی بنائیں کہ آپ لیبل کو اچھی طرح سے پڑھیں اور تجویز کردہ خوراک سے زیادہ دوا ہر گز نہ لیں۔ اگر ممکن ہو، تو باقاعدگی سے درد کش ادویات لینے کی عادت ڈالنے سے پہلے کسی ماہر صحت سے بات کر لیں۔

اگر آپ کا درد بہت خراب ہو، تو آپ کا ڈاکٹر آپ کو نسخے کی دوائیں بھی دے سکتا ہے جیسے اوپیئڈز (یعنی مسکن ادویات)۔ یہ شدید دائمی درد میں بھی مدد کر سکتے ہیں: تاہم، ان کے ساتھ بہت سے ضمنی اثرات بھی وابستہ ہوتے ہیں اور یہ اکثر بہت زیادہ نشہ آور ہوتے ہیں۔ ان درد کش ادویات کو شروع کرنے سے پہلے، آپ کو یہ یقینی بنانا چاہیئے کہ آپ نے ممکنہ ضمنی اثرات کے بارے میں صحت کے پیشہ ورانہ ماہر سے کھل کر بات چیت کر لی ہے اور یہ کہ آپ دیگر دستیاب اختیارات کے بارے میں بھی جانتے ہیں۔

کچھ لوگوں کو یہ بھی معلوم ہوتا ہے کہ ان کے لیے بھنگ کے مآخذات، مثلاً بھنگ کا تیل یا CBD ادویات، دائمی درد کے خلاف مؤثر ثابت ہوتے ہیں۔

اگر آپ کا درد آپ کی جلد میں موجود اعصاب کے ساتھ کسی مسئلے کی وجہ سے ہے، تو آپ کو کیپسیسن پیچ یا جیل کی پیشکش کی بھی جا سکتی ہے۔ یہ اعصاب کو زیادہ متحرک ہونے میں مدد دیتے ہیں اور اس جگہ پر درد کو عارضی طور پر کم کر دیتے ہیں۔ آپ کو صرف صحت کے کسی پیشہ وارانہ ماہر کے مشورے پر ہی کیپسیسین کا استعمال کرنا چاہئیے، کیونکہ یہ جلد کو نقصان بھی پہنچا سکتا ہے۔

TENS

TENS (ٹرانکوٹینیس الیکٹریکل نروو سٹیمولیشن) یہ ایک تکنیک ہے جو اعصابی نظام کی وجہ سے ہونے والے درد میں مدد فراہم کر سکتی ہے۔ اس میں آپ کی جلد کے ساتھ چھوٹے الیکٹروڈ منسلک کیے جائیں گے اور ان میں سے کم وولٹیج کی برقی رو گزرے گی۔ یہ عمل جلد کے نیچے موجود اعصاب کو متحرک کرتا ہے۔ اس سے بہت سے لوگوں کے پٹھوں کو سکون ملتا ہے اور ان کا درد کم ہوتا ہے۔

طرز زندگی میں تبدیلیاں لانا

بہت سے لوگوں کو معلوم ہوتا ہے کہ ان کا دائمی درد مخصوص کھانوں سے بدتر ہو جاتا ہے۔ اس بات پر غور کریں کہ کیا کچھ چیزیں کھانے کے بعد آپ کا درد زیادہ ہو جاتا ہے – عام “محرک غذاؤں” میں ٹماٹر، سرخ گوشت اور سرخ شراب شامل ہیں – اور جہاں تک ممکن ہو انہیں اپنی خوراک سے نکالنے کی کوشش کریں۔ عام طور پر متوازن غذا دائمی درد میں بھی مدد کر سکتی ہے۔ مزید معلومات کے لیے، ہمارے پاس صحت مند کھانے سے متعلق ایک کتابچہ موجود ہے۔

ورزش بھی دائمی درد میں ایک بڑا عنصر ہو سکتی ہے۔ یہ اتنا سادہ نہیں ہے “زیادہ ورزش کریں” – بدقسمتی سے، آپ کو معلوم ہو سکتا ہے کہ کچھ ورزشیں، خاص طور پر زیادہ اثر والی ورزشیں اور ایسی ورزشیں جن میں وزن اٹھانا شامل ہے، آپ کے درد کو مزید خراب کر سکتی ہیں۔ جب کہ اس کے برعکس، ورزش آپ کے پٹھوں کو مضبوط بنا سکتی ہے، آپ کے اعصابی نظام کو سہارا دے سکتی ہے اور آپ کی مجموعی صحت کو بھی اس طرح بہتر بنا سکتی ہے جس سے درد کم ہوتا ہے۔ اگر آپ دائمی درد کے ساتھ محفوظ طریقے سے ورزش کرنے کے طریقے تلاش کرنے کے لیے جدوجہد کر رہے ہیں، تو اس بارے میں فزیو تھراپسٹ یا آکوپیشنل تھراپسٹ سے بات کرنا آپ کے لیے مفید ہو سکتا ہے۔ بیٹھنے کی مشقیں، نرم اور آرام دہ اسٹریچز اور کم اثر والی ورزش جیسے چہل قدمی یا یو گا، یہ سب بدتر درد کو شروع کیے بغیر آپ کی طاقت بڑھانے کے بہترین طریقے ہو سکتے ہیں۔

اگر آپ کو لانگ کووِیڈ یا وائرس کی کسی دوسری انفیکشن کے بعد تھکاوٹ کا مسئلہ درپیش ہے، تو ورزش آپ کی تھکاوٹ کو مزید خراب کر سکتی ہے۔ اگر ورزش آپ کی تھکاوٹ یا درد کو نمایاں طور پر بدتر بناتی ہے، تو آپ کو ہمیشہ اپنے آپ کو روک لینا چاہئیے۔

معاون علاج

معاون علاجوں میں کئی اقسام کے غیر طبی علاج شامل ہیں جو کچھ لوگوں کو دائمی درد میں مفید معلوم ہو سکتے ہیں۔ آپ کو ہمیشہ اس بات کو یقینی بنانا چاہئیے کہ آپ جن لوگوں کے پاس ایسے علاج کے لیے جاتے ہیں وہ مناسب طور پر تربیت یافتہ ہوں اور یہ کہ آپ جانتے ہوں کہ اگر ان کے کام میں کوئی مسئلہ ہوا، تو آپ کو کس سے رابطہ کرنا ہے۔
کچھ معاون علاج جن کے محدود حد تک ثبوت موجود ہیں کہ وہ مددگار ثابت ہو سکتے ہیں، ان میں درج ذیل شامل ہیں:

• اکیو پنکچر اور اکیو پریشر – ان روایتی طریقوں کا مقصد جسم میں توانائی کو دوسری سمت میں بحال کرنا ہوتا ہے۔ ان کا کام کرنے کا طریقہ اچھی طرح سمجھ میں نہیں آتا، لیکن ایسے سائنسی ثبوت موجود ہیں جو تجویز کرتے ہیں کہ جب مناسب طریقے سے انہیں استعمال کیا جائے، تو وہ درد اور پٹھوں کی کھچاؤ میں مدد فراہم کر سکتے ہیں۔
• اروما تھراپی – خوشبو والے تیلوں کا استعمال جسم کو آرام دینے اور اس بات کو متاثر کرنے میں مدد فراہم کر سکتا ہے کہ آپ کا دماغ کس طرح معلومات پر عمل کاری کرتا ہے۔ اروما تھراپی کے ثبوت بہت ملے جلے ہیں، لیکن بہت سے لوگ بتاتے ہیں کہ اروما تھراپی اور مساج تھراپی کا مرکب انہیں آرام دینے اور درد کو کم کرنے میں مدد دیتا ہے۔
• آکسیجن تھراپی – مرتکز شدہ آکسیجن سے سانس لینے، خاص طور پر ہائپربیرک (بلند دباؤ) کے حالات میں، آپ کے جسم کے افعال کو مختصر مدت کے لیے تیز کرنے میں مدد کر سکتی ہے۔ کچھ لوگوں میں، یہ درد میں مفید ثابت ہوتا ہے.
• مساج تھراپی – مساج، خاص طور پر چہرے کا مساج اور چہرے کے پٹھوں کا مساج، جسم کے ایسے پٹھوں کے تناؤ کو پُرسکون ہونے میں مدد فراہم کر سکتا ہے جو درد کا سبب بن سکتے ہیں۔ یہ پھنسے ہوئے اعصاب کو بھی ڈھیلا کر سکتا ہے جو درد کو مزید بدتر بنا سکتا ہے۔ اہم – مساج تھراپسٹ آپ سے اپنے کپڑے اتارنے کو کہہ سکتے ہیں تاکہ وہ آپ کی جلد کو براہ راست چھو سکیں۔ یاد رکھیں کہ آپ کو کوئی ایسا کام نہیں کرنا چاہئیے، جس سے آپ کو تکلیف ہو۔
• مراقبہ اور ذہن سازی – اپنے آپ کو آرام دینے اور اپنے درد کو پہچاننے اور سمجھنے کے لیے تکنیکوں کا استعمال، اس درد سے نمٹنے کا ایک طاقتور ذریعہ ہے۔